潮流大廈十四樓
畫室位於旺角區潮流大廈十四樓 ，即潮流商場的樓上住宅單位。畫室老闆兼導師陸生透露，三樓以下為商業用途，其餘樓層營商則屬違法。偶然有保安上樓巡視， 陸生會露出非常謹慎的表情，但同時卻發現同層有兩間售賣高級膽機音響的公司大開中門做生意，藝術和小商戶都得以在大業主「隻眼開﹑隻眼閉」下搵到下生計。陸生平日教畫授徒，但星期三早上十一點，則是資深畫友畫聚，資深畫友也就是我一連四個星期三的服務對象。
我地都好支持社運
四百呎單位內放滿油畫畫作和石膏雕塑，電暖爐和射燈早已預備好，好讓作為模特兒的 阿魚有更好的生理質素和視覺效果。近來氣溫十五﹑六度，脫掉衣服，擺好一個各人都滿意的姿勢，各位藝術家開始在畫架前觀察我。為怕魚 冷病，暖爐開得好大，他們都開始要脫掉冗腫的衣服，開始多話。
操大陸口音的畫室老闆 陸生問魚﹕「你識唔識小敏？」「識呀……」魚答。其後，宗教迷文哥一連向魚提出好幾個魚 熟悉的名字，這些都是魚上街遊行時認識的一些朋友。是的，這份模特兒工作是他們介紹的，但魚沒有想過原來這麼多人幹過。老闆陸生問﹕「你都係出來攪攪震？哈哈哈……」這哈哈哈似乎包含除了「高興」和「覺得有趣」之外的其他含意。「之前有參與下啦。」 魚話，「你地都支持左好多社運人士既經濟……」老闆陸生搶白「係呀！我地好支持社運架。」「你仲識邊個？識唔識陳巧文？我好想畫佢！但係你知道嗎，如果比佢爭取到西藏獨立，俄羅斯同中國可能要打成千年仗，佢D愛國觀念根本就唔啱。」畫室突然鴉雀無聲良久，一時間魚攪唔清楚佢想畫陳巧文係基於欣賞陳巧文，定係想蹧躓陳巧文。而其他畫友似乎都因老闆陸生一句「我地」，刻意沉默起來。
藝術家傾閒計
老闆陸生其實都要靠班畫友上黎畫畫，先為之有生意，因此為博畫友一笑，每次都非常落力策動社交話題。
「 司徒生，近排D 股票點，賺得多唔多？」 陸生問。司徒生係唔知咩畫會話事人，住港島豪宅。
「 司徒生，最近去左邊度旅行寫生？」 陸生又問，呢次各人終於有D反應。
「法國囉，又去。」 司徒生話。
「上次去左意大利。」話少又低調的張生都有自己晝室教晝，洋名係法文，叫Phoenix。
「西藏返黎之嘛。」宗教迷文哥剛見完師父回港，前公務員，食左長俸後已經唔使做。
「返廣州，老家呀。」最德高望重的達叔，廣州雕刻界前輩，近年開始畫油畫，八十幾歲人，行得走得，貌似司徒華。
隨後，魚恍惚看了半小時的寰宇風情。
藝術館，名勝古蹟，紅酒﹑魚子醬﹑咖啡﹑寫生﹑艷遇﹑宗教修練，呢種旅遊佢地一年去十次八次。魚再諗返自己，只死慳死抵去過台灣﹑ 北京 。歐洲?是魚暫無能力去追趕的飛行里數。此時此刻一種想「離開原居地」的念頭萌生，就好似知足的非洲部落兒童見過遊戲機之後，想離開非洲了解下非洲點解無遊戲機。是因為非洲部落唔炒股票嗎？魚想。
當代騎哩藝術
「司徒生，你仲有無過火炭果便畫？」 陸生問。
「間唔中啦。」 司徒生話。
「有無去睇伙炭藝術開放日?」 陸生問。
「無啦，都唔知叫咩藝術。」 司徒生答。
「計我話果d叫騎哩藝術……」 陸生眉飛色舞繼續講，「果d將曾蔭權個頭key落d動物度都唔知咩藝術，不過宜家興呀。蘇富比專拍賣埋果d懶有政治色彩既畫，而家個個都作果d騎哩野，無美感架……大陸d人仲過份，咩行為藝術控訴間大學呀，兩男兩女就係大學前面做愛呀，哈哈。」
「有d鬼佬畫室都係啦，art jam畫下速寫，邊畫到野架，請個model返去睇之嘛。」宗教迷文哥也加入當代藝術的討論。
「去咩伙炭開放日，搵日約埋上深圳畫家村嘆下畫﹑買下畫具啦﹗」 Phoenix 提議。
伙炭開放日，曾是魚的夢想。所有自然孕育的藝術社區都必然會因出名而租金倍升，接著就是藝術家遷出，變成遊客區。深圳畫家村大概是發展的剩餘物，上回魚到北京798，早已變成有畫具賣的遊客區，伙炭開放日人流愈來愈多，火炭工廈租金愈來愈貴，魚很擔心火炭變成有遊客區，最後魚的工作室設在觀塘。
「model，你識唔識長毛？」 陸生突然打斷魚的思路。
「識又點？唔識又點 ？」 陸生誤以為生得年青就是八十後，八十後就識長毛吧？魚極度無奈。
「無，我宜家構思緊個個人project……我想畫下d政治人物裸體，或者你地d80後裸體咁，俾我畫都應該好光榮喇啩，哈哈……」 陸生兩眼出現了創作人的閃光。
魚咬緊下唇，阻止自己的心聲衝口而出。( 陸生，你都想玩騎哩藝術？)
理財有道
潮流大廈十四樓有個不明文規矩，就是會請model飲茶。也好，對魚來說是省回午飯錢。上午modeling完畢，他們會先付錢，午飯後再加鐘，下午再行計算。
「$400除6人(還有陸生一個從不說話的學生)，每人$66.66666……」 陸生向大家收費。「每人$67。」
數目何其零丁，卻發覺他們會設法找零錢找續。飲茶結帳，沒有人搶埋單，均均爭爭的AA制是他們的默契。
或許歐洲藝術館，名勝古蹟，紅酒﹑魚子醬﹑咖啡﹑寫生﹑艷遇﹑宗教修練…..是這樣來的， 魚平日的生活，也許太豪氣﹑太藝術家脾氣了。
牛津橋與騎哩路
下午加了一小時，工作完畢，收拾細軟時獨對陸生。
「 司徒生呢，個女讀英國名牌大學，做投資架，不過嫌辛苦，都係開畫室算。」
「 Phoenix 同文哥呢，兩個個仔都廿幾三十歲，到宜家仲未諗到做做咩，驚佢地諗埋一便會痴線。」
魚咩都無問，但陸生自己不停講，反而魚對打扮相當清貧的達叔就有d興趣。「咁達叔呢？」一個陸生鍾意答咩都得的開放式問題。
「 達叔個仔係天后有間化妝學校，而家諗緊夜晚可以做埋畫室，等達叔有d細藝。」
藝術天份或許可以遺傳，生意頭腦？都係。
魚係畫室入面，忽然間覺得香港藝術同生意原來好難分辨。
兩代人既野咁複雜，點到魚諗，背起背包，你走你的牛津橋，我行我的騎哩路。